برف پھر گریگی

اطلاعات رپورٹر
سرینگر18نومبر
بدھ اور جمعرات یعنی19 اور20نومبر کو کشمیر کے بالائی اور میدانی علاقوں میں ایک بار پھر موسلادھار بارشوں اور ہلکی سے بھاری برفباری کی پیشن گوئی کی گئی ہے اور اس سلسلے میں محکمہ موسمیات نے ریاست کی ڈزاسٹر منیجمنٹ سیل کو تحریری طور مطلع کیا ہے۔محکمہ موسمیات کا کہنا ہے کہ بدھوار کو ویسٹرن ڈسٹربنسز کی وجہ سے ایک بار پھر کشمیر کا موسم خراب ہوسکتا ہے اور اس دوران کم سے کم دو روز تک بالائی اور میدانی علاقوں میں بارش اور برفباری کی توقع ہے۔ڈزاسٹر منیجمنٹ سیل کے سربراہ عامر علی نے'اطلاعات' کو بتایا''مغربی ہوائیں ایک بار پھر جموں کشمیر کے موسم کو خراب کرسکتی ہیں اور توقع ہے کہ 19اور20نومبر کے روز موسم کافی خراب رہے گا''۔عامر علی نے تاہم بتایا کہ موسم کی خرابی سے موجودہ درجہ حرارت پر کوئی خاص فرق نہیں پڑے گا۔یاد رہے کہ ان دنوں دن کا زیادہ سے زیادہ درجہ حرارت7اور8ڈگری سیلسیس کے درمیان اور رات کا  ایک ڈگری کے درمیان ریکارڈ کیا جا رہا ہے۔
محکمہ موسمیات کے ڈائیریکٹر ٹی' کے جوتشی نے 'اطلاعات' کو بتایا''19اور 20نومبر کو جموں کشمیر میں بارشیں اور برفباری ہونے کی توقع ہے اور یہ ایک بار پھر مغربی ہوائوں کا نتیجہ ہوگا''۔جوتشی نے کہا کہ ریاست جموں و کشمیر میں بدھ اور جمعرات کو ایک بار پھر مغربی ڈسٹربنسز کی وجہ سے موسم میں خرابی متوقع ہے۔ جوتشی کے مطابق''ہم نے ڈزاسٹر منیجمنٹ سیل کو موسم کی تبدیلی کے بارے میں مطلع کیا ہے''۔ کشمیر میں گذشتہ جمعرات کو اس موسم کی پہلی برفباری ہوئی تھی۔ گذشتہ جمعرات کو جب لوگ نیند سے جاگے تو اُنہوں نے اپنے گرد وپیش کو برف کی سفید چادر میں لپٹا ہوا پایا۔ اس طرح ٹھیک ایک ہفتے کے بعد موسم ایک بار پھر بگڑنے کی توقع ہے۔