سرینگر کشمیر

اطلاعات نیوز سروس// سانحہ شوپیان کے خلاف ایجی ٹیشن کے دوران زخمی ہوئے منظور احمد بٹ کی وفات پر گہرے صدمے کا اظہار کرتے ہوئے شوپیان مجلس مشاورت نے درنگہ بل بارہمولہ جاکر منظور احمد بٹ ولد غلام نبی بٹ کے لواحقین سے تعزیت کرنے کا فیصلہ کیا ہے۔ شوپیان مجلس مشاورت ذرائع نے اطلاعات کو بتایا کہ اُنہیں درنگہ بل کے منظور احمد بٹ کی موت سے صدمہ پہنچا ہے اور اُن کی موت پر پورا ضلع شوپیان سوگوار ہے۔ مجلس کی ایک میٹنگ منعقد ہوئی جس کے دوران منظور احمد بٹ کے انتقال پر اُس کے گھروالوں کے ساتھ یکجہتی کا اظہار کرنے کی خاطر فیصلہ لیا گیا کہ مجلس کے عہدیدار درنگہ بل بارہمولہ جاکر منظور احمد بٹ کے قریبی رشتہ داروں سے تعزیت کریں گے۔ شوپیان مجلس مشاورت کے مطابق اُنہیں منظور احمد کی موت پر افسوس ہے۔ کل ہوئی اس میٹنگ کے دوران بتایا گیا ” منظور احمد بٹ کی شہادت ضرور رنگ لائے گی اور آسیہ اور نیلوفر کے قاتلوں کو کیفر کردار تک پہنچایا جائے گا“۔ مجلس مشاورت کے عہدیداروں نے میٹنگ میں عہد کیا کہ وہ منظور احمد بٹ ساکنہ درنگہ بل کی قربانی کو پیش نظر رکھتے ہوئے آسیہ اور نیلوفر کی عصمت دری و قتل میں ملوث عناصر کی نشاندہی تک اپنی جد وجہد جاری رکھیں گے۔ قابل ذکر ہے کہ منظور احمد بٹ گذشتہ برس کے ماہ جون کے دوران شوپیان سانحہ کے خلاف ایک احتجاجی مظاہرے میںفورسز کے ہاتھوں زخمی ہوا تھا اور وہ کم وبیش نو ماہ تک موت وحیات کی کشمکش میں مبتلاءرہنے کے بعد دو روز قبل زندگی کی جنگ ہار گیا۔

(کوئی ریٹنگ نہیں)

 Loading ...